काठमाडौं, साउन ८ – नेपाल प्रिमियर लिग (एनपीएल) क्रिकेटको दोस्रो संस्करण अब रातिमा पनि खेलिने भएको छ। त्रिभुवन विश्वविद्यालयको कीर्तिपुरस्थित क्रिकेट मैदानमा अहिले फ्लडलाइट जडानको काम तीव्र गतिमा भइरहेको छ, जसपछि खेलहरू साँझपख वा राति सञ्चालन गर्ने तयारी गरिएको छ।
नेपाल क्रिकेट संघ (क्यान)का सचिव पारस खड्काले सुदूरपश्चिम रोयल्स फ्रेन्चाइज टोलीसँगको पोडकास्टमा पहिलोपटक सार्वजनिक रूपमा यो जानकारी दिएका थिए। उनको भनाइलाई पुष्टि गर्दै क्यानका प्रवक्ता छुम्बी लामाले भने,अहिले त्रिवि मैदान स्तरोन्नति भइरहेको छ समयमै काम सकिएपछि फ्लडलाइटमा रातिको खेलको योजना छ।
त्रिवि मैदानमा हाल १५ हजार दर्शक क्षमता हुने प्यारापिट बनाउने र ६ वटा फ्लडलाइट टावर जडान गर्ने काम भइरहेको छ। असार मसान्तसम्म सकिने भनिएको काम समयमै सम्पन्न हुन नसकेपछि निर्माण कम्पनीलाई हर्जाना तिराएर म्याद थप गरिएको छ।
लामा भन्छन्, निर्माणको पहिलो चरण अन्तिम चरणमा छ। काममा ढिलाइ भएको छ तर कामलाई प्रभावकारी रूपमा अघि बढाइएको छ।
क्यानका अनुसार एनपीएलको दोस्रो संस्करण नोभेम्बर–डिसेम्बर महिनामा आयोजना हुनेछ। त्यसअघि अगस्ट महिनामा मिनी अक्सन गरिने तालिका तय भइसकेको छ। अक्सनका लागि खेलाडी दर्ता भइसकेको छ भने अब केही दिनमै अन्तिम सूची सार्वजनिक गरिनेछ।
एनपीएललाई सफल बनाउन फ्रेन्चाइजहरू, मैदान व्यवस्थापन, तथा दर्शकहरूको आकर्षणका लागि आवश्यक पूर्वाधार निर्माणमा जोड दिइएको क्यानले जनाएको छ। हाम्रो लक्ष्य एनपीएललाई अन्तर्राष्ट्रिय स्तरको बनाउने हो, र रातिको खेलले दर्शक र विज्ञापन दुवै बढाउने अपेक्षा गरेका छौं,लामा भन्छन्।
यसअघिका संस्करणहरू दिउँसो मात्र खेलाइएका थिए। पहिलोपटक त्रिविमा फ्लडलाइटमा रातिको खेल हुँदैछ। यो नेपाली क्रिकेटका लागि ऐतिहासिक मोड हुनेछ जसले भविष्यमा अन्य प्रतियोगिता आयोजना गर्न समेत सहज बनाउनेछ।
एनपीएलका लागि विभिन्न राष्ट्रिय तथा युवा खेलाडीहरूलाई फ्रेन्चाइजहरूले प्राथमिकता दिने तयारीमा छन्। हामी युवालाई अवसर दिन चाहन्छौं। यसपटकको अक्सन निकै प्रतिस्पर्धात्मक हुनेछ एक फ्रेन्चाइज प्रतिनिधिले भने।
एनपीएलको दोस्रो संस्करण नयाँ स्तरमा पुग्ने तयारीमा छ। रातिको खेल, स्तरीय मैदान, फ्लडलाइटको आकर्षण र योजनाबद्ध व्यवस्थापनले यो संस्करणलाई सफल बनाउने अपेक्षा गरिएको छ। क्रिकेटप्रेमीका लागि यो खुसीको खबर हो अब नेपाली क्रिकेट पनि रातिको उज्यालोमा चम्किनेछ।
