एनपीएल हेर्न ५ सयदेखि २ हजारसम्म तिर्नुपर्ने, सिजनभरका लागि पास १५ हजारमा

कार्तिक २७, २०८२। राज नेपाली

काठमाडौं – नेपाल क्रिकेट संघ (क्यान) ले बिहीबार दोस्रो संस्करणको नेपाल प्रिमियर लिग (एनपीएल) का लागि टिकट मूल्य सार्वजनिक गरेको छ। कीर्तिपुरस्थित पुनर्निर्माण गरिएको त्रिभुवन विश्वविद्यालय (त्रिवि) क्रिकेट मैदानमा मंसिर १ देखि २७ गतेसम्म हुने प्रतियोगिता हेर्न दर्शकले ५ सयदेखि २ हजार रुपैयाँसम्म तिर्नुपर्नेछ।

क्यानका अनुसार पहिलो चरणमा पहिला ६ दिनका खेलका लागि टिकट बिक्री खुला गरिएको छ। टिकट खल्ती र आईएमई एपमार्फत खरिद गर्न सकिनेछ।

उद्घाटन र शनिबारका खेलका लागि साधारण टिकट ५ सय रुपैयाँ र प्रिमियम टिकट १५ सय रुपैयाँ तोकिएको छ। अन्य समूह चरणका खेलमा साधारण टिकट ५ सय र प्रिमियम टिकट १ हजार रुपैयाँ पर्नेछ।

त्यस्तै, प्लेअफ र फाइनलका खेलका लागि साधारण टिकट १ हजार र प्रिमियम टिकट २ हजार रुपैयाँ हुनेछ।

लिगका सबै खेल हेर्न चाहने दर्शकका लागि सिजन पास १५ हजार रुपैयाँमा उपलब्ध हुनेछ।

यसपटकको एनपीएल मंसिर १ गते उद्घाटन खेलबाट सुरु हुनेछ, जहाँ साबिक विजेता जनकपुर बोल्ट्स र काठमाडौं गोर्खाज आमनेसामने हुनेछन्। खेल दिउँसो ४ बजे सुरु हुने जनाइएको छ।

नेपाल प्रिमियर लिगको दोस्रो संस्करणमा देशका उत्कृष्ट क्लबहरूबीच प्रतिस्पर्धा हुने अपेक्षा खेल हो । दर्शकको संख्या र वातावरणका हिसाबले यो लिग नेपाली क्रिकेटको सर्वाधिक भव्य प्रतियोगिता हो ।