इजरायलले नेपाली कृषि विद्यार्थी र कियरगिभरलाई दीर्घकालीन रोजगारी प्रस्ताव

मंसिर ९, २०८२। काठमाडौँ दैनिक संवाददाता

काठमाडौ – इजरायलले नेपाली कृषि विद्यार्थी र घरमा आधारित सहायक श्रमिक (कियरगिभर)लाई ५ वर्षका लागि दीर्घकालीन रोजगार दिने प्रस्तावसहित दुई नयाँ प्रोटोकलको मस्यौदा नेपाललाई पठाएको छ। यससँगै हालको श्रम सम्झौता परिमार्जन गर्दै तीन प्रोटोकल मन्त्रिपरिषद् स्वीकृतिका लागि अघि बढाइएको छ।

श्रम, रोजगार तथा सामाजिक सुरक्षा मन्त्रालयका अनुसार अस्पतालमा रहेका वृद्धवृद्धालाई स्याहारसुसार गर्ने हालको प्रोटोकल परिमार्जनसहित आएको छ भने कृषिका विद्यार्थी र घरमै बसेर कियरगिभर सेवा प्रदान गर्ने दुई नयाँ प्रोटोकल थप पठाइएको हो। मन्त्रालयका अधिकारीका अनुसार तीन प्रोटोकलमध्ये दुई पूर्णतया नयाँ हुन्।

मन्त्रालयले आवश्यक छलफलपछि मस्यौदालाई मन्त्रिपरिषद्को विधेयक समितिमा पठाइसकेको छ। स्वीकृति पाएपछि दुवै देशबीच हस्ताक्षर प्रक्रिया अघि बढ्नेछ। प्रस्ताव स्वीकृत भएमा नेपाली कृषि विद्यार्थीले ‘लर्न एन्ड अर्न’ कार्यक्रमपछि दीर्घकालीन रोजगारमा रूपान्तरण गरी कृषि क्षेत्रमा श्रमिकको हैसियतमा काम गर्न पाउनेछन्। हाल उक्त कार्यक्रममार्फत करिब तीन हजार नेपाली इजरायल गइसकेका छन्।

त्यस्तै, घरमै बसेर वृद्धवृद्धा तथा शारीरिक अशक्तता भएका व्यक्तिलाई स्याहारसुसार गर्ने क्षेत्रमा पनि रोजगार दिने इजरायलको प्रस्ताव छ। २००७ देखि नेपाली घरमै आधारित कियरगिभरका रूपमा काम गरिरहेका भए पनि म्यानपावरमार्फत हुने शोषणका कारण नयाँ श्रमिक पठाइने प्रक्रिया रोकिएको थियो।

हाल इजरायलमा झन्डै पाँच हजार नेपाली कार्यरत छन्। पछिल्लो चार वर्षदेखि भने वेताबोधमार्फत मात्र श्रमिक पठाउँदै आइएको छ। एक वर्षअघि छानिएका २१ सय १२ मध्ये ८ सयभन्दा बढी श्रमिक त्यहाँ पुगिसकेका छन्।